तिरंग्याच्या रंगात रंगल्या रौजतुल मोमिनातच्या विद्यार्थिनी; देशभक्तीने स्वातंत्र्यदिनाचा उत्साह द्विगुणित
लामजना, ता. औसा : देशभक्तीची भावना, शिस्तबद्ध संचलन, तिरंग्याच्या रंगातील आकर्षक वेशभूषा आणि विद्यार्थिनींच्या उत्स्फूर्त सहभागाने लामजना येथील मदरसा रौजतुल मोमिनात येथे स्वातंत्र्यदिनाचा सोहळा उत्साहात व अविस्मरणीय वातावरणात पार पडला. १५ ऑगस्ट २०२६ रोजी आयोजित या कार्यक्रमात विद्यार्थिनींनी विविध कलागुणांचे प्रभावी सादरीकरण करून उपस्थितांची मने जिंकली.
स्वातंत्र्यदिनानिमित्त मदरसा परिसराची आकर्षक सजावट करण्यात आली होती. तिरंग्याच्या रंगातील वेशभूषेत सजलेल्या विद्यार्थिनींनी शिस्तबद्ध संचलन करत कार्यक्रमात सहभाग नोंदविला. परिसरात डौलाने फडकणारा राष्ट्रध्वज आणि देशभक्तीने भारावलेले वातावरण यामुळे संपूर्ण परिसरात स्वातंत्र्यदिनाचा उत्साह ओसंडून वाहत होता.
कार्यक्रमाची सुरुवात पवित्र कुरआन पठणाने झाली. त्यानंतर विद्यार्थिनींनी हम्द, नात, देशभक्तीपर गीते, विविध विषयांवरील भाषणे तसेच शैक्षणिक व सांस्कृतिक कार्यक्रम सादर केले. ‘सारे जहाँ से अच्छा’ या देशभक्तीपर गीताच्या सादरीकरणाने कार्यक्रमात विशेष रंगत आणली.
यानंतर ध्वजारोहण करून राष्ट्रगीत सादर करण्यात आले. लहान विद्यार्थिनींपासून मोठ्या विद्यार्थिनींपर्यंत सर्वांनी शिस्त, आत्मविश्वास आणि उत्साहाने सहभाग घेतला. त्यांच्या सादरीकरणातून देशप्रेम, राष्ट्रीय एकात्मता आणि जबाबदार नागरिकत्वाचा संदेश प्रभावीपणे देण्यात आला.
सुमारे चार तास चाललेल्या या कार्यक्रमात विद्यार्थिनींनी वक्तृत्व, साहित्य, सांस्कृतिक कला आणि सर्जनशीलतेचे प्रभावी दर्शन घडविले. विद्यार्थिनींच्या आत्मविश्वासपूर्ण सादरीकरणाचे उपस्थित पालक, शिक्षक आणि नागरिकांनी कौतुक केले.
मदरसा रौजतुल मोमिनातच्या स्थापनेपासून दरवर्षी स्वातंत्र्यदिनानिमित्त विविध उपक्रमांचे आयोजन केले जाते. धार्मिक शिक्षणासोबतच आधुनिक शिक्षण, संस्कार, देशाची इतिहासपरंपरा, स्वातंत्र्याचे महत्त्व आणि सामाजिक जबाबदारी यांची जाणीव विद्यार्थिनींमध्ये निर्माण करण्याचा प्रयत्न संस्थेच्या माध्यमातून केला जातो.
मदरसा रौजतुल मोमिनात हे नॅशनल एज्युकेशन अँड चॅरिटेबल ट्रस्ट, लातूर यांच्या अंतर्गत दीन व आधुनिक शिक्षण तसेच संस्कार क्षेत्रात कार्यरत आहे.
कार्यक्रमाच्या समारोपप्रसंगी संस्थेचे संरक्षक, संस्थापक, नाझिम व सचिव मुफ्ती अब्दुल वाजिद साहेब मुझाहिरी यांनी विद्यार्थिनींना मार्गदर्शन केले. स्वातंत्र्य हा केवळ उत्सव नसून मोठी जबाबदारी असल्याचे सांगत त्यांनी विद्यार्थिनींनी शिक्षणासोबत उत्तम चारित्र्य, प्रामाणिकपणा, मेहनत, पालक व शिक्षकांचा सन्मान आणि देशाच्या प्रगतीत सकारात्मक योगदान देण्याचे आवाहन केले.
समाजात शांतता, प्रेम, बंधुभाव आणि एकोपा वाढविण्यासाठी प्रत्येकाने आपली जबाबदारी पार पाडावी, असेही त्यांनी सांगितले. कार्यक्रमाच्या शेवटी देशाची प्रगती, शांतता, सुरक्षितता आणि समृद्धीसाठी विशेष प्रार्थना करण्यात आली.
लामजन्यातील या स्वातंत्र्यदिन सोहळ्यात तिरंग्याच्या रंगात सजलेल्या विद्यार्थिनींचा उत्साह, शिस्तबद्ध सहभाग आणि देशभक्तीचा संदेश विशेष आकर्षणाचा केंद्रबिंदू ठरला.
