पीए प्रकरणावर राणा जगजितसिंह पाटील यांचे स्पष्ट वक्तव्य; म्हणाले, सत्य समोर
येईल, चौकशी होऊन योग्य ती कारवाई होईल!
‘छोट्या विषयांचे मोठे करण्यापेक्षा दुष्काळ, पाणी आणि शेतकऱ्यांच्या प्रश्नांवर लक्ष केंद्रित करा’; विरोधकांना अप्रत्यक्ष टोला
सय्यद कलीम मुसा | दैनिक त्रिशक्ती
धाराशिव जिल्ह्यातील तुळजाभवानी मंदिरातील कथित प्रकरणावरून सुरू असलेल्या चर्चेच्या पार्श्वभूमीवर आमदार राणा जगजितसिंह पाटील यांनी आपली भूमिका स्पष्ट केली आहे. संबंधित प्रकरणाची व्यवस्थित चौकशी होईल आणि दोषी आढळणाऱ्यांवर योग्य ती कारवाई केली जाईल, असे त्यांनी स्पष्ट केले. या प्रकरणाबाबत आपण यापूर्वीच भूमिका मांडली असून, उपलब्ध व्हिडिओंच्या आधारे वस्तुस्थिती समोर येऊ शकते, असेही त्यांनी सांगितले.
‘माझे नाव विनाकारण जोडू नका; आधी संपूर्ण वस्तुस्थिती तपासा!’
या प्रकरणावर बोलताना राणा जगजितसिंह पाटील म्हणाले की, घटनेची संपूर्ण माहिती समजून घेणे महत्त्वाचे आहे. माझ्या पीएने काही चुकीचे केले किंवा अन्य काही प्रकार घडल्याच्या चर्चा होत असताना त्यामध्ये माझे नाव ठळकपणे जोडले जाते. मात्र, कोण कधी आले, काय घडले, याबाबतचे व्हिडिओ उपलब्ध आहेत. त्यामुळे कोणताही निष्कर्ष काढण्यापूर्वी संपूर्ण वस्तुस्थिती तपासली पाहिजे, अशी विनंती त्यांनी केली.
ते पुढे म्हणाले की, संबंधित प्रकरणात जे काही घडले आहे, त्याची योग्य पद्धतीने चौकशी होईल. सत्य लपविण्यासारखे काहीही नसून, उपलब्ध पुराव्यांच्या आधारे वस्तुस्थिती स्पष्ट होऊ शकते.
दुष्काळाच्या संकटात पाणी, धान्य आणि रोजगार हेच खरे प्रश्न!
धाराशिव जिल्ह्यात सध्या दुष्काळी परिस्थिती गंभीर असून, नागरिकांना पिण्याच्या पाण्याची चिंता सतावत आहे. अशा परिस्थितीत राजकीय आरोप-प्रत्यारोपांपेक्षा जनतेच्या मूलभूत प्रश्नांना प्राधान्य देणे आवश्यक असल्याचे पाटील यांनी अधोरेखित केले.
“आज महत्त्वाचे आहे ते पिण्याचे पाणी, महत्त्वाचे आहे ते धान्य आणि महत्त्वाचे आहे ते लोकांच्या हाताला काम मिळणे,” असे सांगत त्यांनी जिल्ह्यातील महत्त्वाच्या प्रश्नांवर अधिक लक्ष केंद्रित करण्याचे आवाहन केले.
२०२० च्या पीकविमा प्रकरणासाठी सर्वोच्च न्यायालयात पाठपुरावा सुरूच!
खरीप २०२० च्या पीकविमा प्रकरणाचा उल्लेख करताना राणा जगजितसिंह पाटील यांनी शेतकऱ्यांच्या हक्कासाठी सुरू असलेल्या न्यायालयीन लढ्याची माहिती दिली. शेतकऱ्यांना पीकविम्याची रक्कम मिळवून देण्यासाठी सातत्याने प्रयत्न सुरू असून, या प्रकरणात आतापर्यंत १६ सुनावण्या झाल्याचे त्यांनी सांगितले.
या प्रश्नावर आपण प्रत्येक सुनावणीला उपस्थित राहून पाठपुरावा करत असल्याचे नमूद करत, शेतकऱ्यांना न्याय मिळवून देण्यासाठी सुरू असलेल्या प्रयत्नांना सकारात्मक प्रतिसाद देण्याचे आवाहन त्यांनी केले.
‘विकासकामांवर लक्ष केंद्रित करा’; विरोधकांवर अप्रत्यक्ष निशाणा
धाराशिव जिल्ह्यात विविध महत्त्वाच्या कामांसाठी मोठ्या प्रमाणावर निधी आणण्याचा प्रयत्न सुरू आहे. मुख्यमंत्री देवेंद्र फडणवीस यांच्या नेतृत्वाखालील भाजप सरकारमुळे यापूर्वी अशक्य वाटणारी काही कामे शक्य होत असल्याचा दावा राणा जगजितसिंह पाटील यांनी केला.
मात्र, विकासकामांऐवजी काही जण छोट्या विषयांना मोठे करून जनतेचे लक्ष विचलित करण्याचा प्रयत्न करत असल्याची टीकाही त्यांनी केली.
“आपण प्रामाणिकपणे जिल्ह्याच्या विकासासाठी काम करत आहोत. त्यामुळे जनतेच्या खऱ्या प्रश्नांवर लक्ष केंद्रित करणे गरजेचे आहे,” असे त्यांनी स्पष्ट केले.
दुष्काळग्रस्त जनतेच्या प्रश्नांना प्राधान्य देण्याचे आवाहन
जिल्ह्यातील पाणीटंचाई, शेतकऱ्यांचे प्रश्न, पीकविमा आणि रोजगार या विषयांवर सर्वांनी एकत्रितपणे लक्ष केंद्रित करावे, अशी भूमिका राणा जगजितसिंह पाटील यांनी मांडली.
एका बाजूला दुष्काळाचे संकट आणि दुसऱ्या बाजूला शेतकऱ्यांच्या हक्काची लढाई सुरू असताना, राजकीय चर्चांपेक्षा जनतेच्या प्रश्नांना प्राधान्य द्यावे, हा संदेश त्यांच्या वक्तव्यातून समोर आला आहे.
— दैनिक त्रिशक्ती | निष्पक्ष नजर… निष्पक्ष खबर…
